میللی بیرلیک
حاققیندا موصاحیبه‌لر سیراسیندا میللی بیرلیک دوشرگه‌جیگی سایین داوود بَی
توران، دیرَنیش تشکیلاتی‌نین سؤزچوسو ایله موصاحیبه آپاریب. اؤنجهلیکله سایین
داوود بَی توران‌دان موصاحیبه‌نی حاضیرلادیغی اوچون تشککور ائدیریک.
سیزجه میللی
بیرلیک نه دئمک دیر؟ بیرلیگی نئجه تعریف ائدیرسینیز؟
هر بیر حرکت اؤز هدف و ایستکلرینه چاتماق اوچون عضولری‌نین بیر آرایا گلمه‌سیندن
تشکیل تاپیپ و قاباغا گئدر. حرکتین گوجلو
اولماسی و هدفلرینه داها تئز یئتیشمه‌سی عضولر آراسینداکی ایلیشگی و چالیشما
شکلینه باغلی‌دیر. حرکتی گئنیش شکیلده دوشوندویوموز زامان عضولرین یئرینی گروهلار
آلماقدادیر. یعنی حرکت میللی اولاراق تعریفله‌نیب و گروه یا سازمانلار بو حرکت
ایچریسینده عضولرین نقشینی اویناییرلار. نئجه کی بیر حرکتین باشاریلی اولماسی او
حرکت ایچریسینده‌کی عضولرین آراسینداکی ایش‌بیرلیگینه باغلی‌دیر، گئنیش آنلامدا دا
میللی حرکتین باشاریسی گروه و سازمانلار آراسینداکی ایلیشگی و ایش‌بیرلیگیندن
آسیلی‌دیر. میللی بیرلیک مسئله‌سی بورادا اورتایا چیخماقدادیر. بیزیم میللی
اولاراق گؤردوگوموز هدف و ایستکلر واردیر. حتی حرکتیمیزی بئله، میللی حرکت
آدلاندیریریق. دئمک بیزی بیر یئره ییغان میللی دیَرلر واردیر. بیز بو میللی دیَرلره
صاحیب اولوب میللی حرکت چرچیوه‌سینده فعالیت ائدیریک. او زامان بو حرکت ایچریسینده
شخص، گروه و سازمان ... آراسیندا اورتاق میللی دیَرلر و اورتاق میللی مفکوره
واردیر. میللی بیرلیگی یاراداجاق ان اؤنملی ایکی عنصر منه گؤره بونلاردیر. اگر بیز
تعریفله‌دیگیمیز چاتی آلتیندا باشاری الده ائتمک ایسته‌ییرسک، بو بیرلیگین حاکم
اولماسی گرکلی بیر شرطدیر. داغینیق گوجلر گوجسوزلوک گتیردیگی اوچون، بیرلیک
قاورامینا بیز اساسی مفهولاریمیزین اوزَریندن باشلامالی‌ییق.
ميللي حركت
آتمسفرينده تعريفله‌ديگينيز میللی بيرليگين نه اؤنمی وار؟ آیریحا بوگونکو دورومدا
میللی بیرلیگه نه گرک وار؟
بوگون اعتباری
ایله میللی حرکت ایچریسینده میللی بیرلیگه دویولان احتیاج هر گوندن داها چوخ حیسس
ائدیلمکده‌دیر. اونون اوچون گونوموز شرایطی آچیسیندان میللی بیرلیگین اؤنمی
اورتایا چیخماقدادیر. بیرلیک مفهومونون یئرینه دوشمه‌سی سؤزده دئییل عملده بیرلیک
یاراتما اؤنمی‌نی بیر نئچه آچیدان دیَرلندیره بیله‌ریک:
بیرینجی اولاراق
آذربایجان میللی حرکتی گون کئچدیکجه گلیشمه‌ده و گئنیشلنمک‌ده‌دیر. سیاسی، اجتماعی
و کولتورل بیر حرکت اولان میللی حرکتین گلیشمه‌سی و گئنیشلنمه‌سی ایله برابر فرقلی
فیکیرلرین اورتایا چیخدیغینا دا شاهید اولوروق. فرقلی فیکیرلر اگر میللی بیرلیک
چاتیسی آلتیندا بیر آرایا گلمزلرسه، بیزیم حرکت ایچریسینده زنگین‌لیک یئرینه داغینیقلیغا
نه‌دن اولا بیلر. اونا گؤره بو فیکیرلرین و دیالوق سوییه‌سینه گلیب و میللی حرکتین
میللی منفعت‌لری دوغرولتوسوندا ایشلتمک لازیمدیر.
ایکینجی اؤنم
آچیسیندان ایسه بؤلگه‌ده‌کی سیاسی دَییشیک‌لیک‌لر قارشی‌سیندا، بیزیم بیر سیاسی
بوتونلوک اولوشدورمامیزی ایسته‌مکده‌دیر. چونکی اگر بیز بیر سیاسی گوج اولاراق
اورتایا چیخماق ایسته‌ییریک‌سه او زامان سیاسی بوتونلوک و بیرلیگیمیزی ساغلامامیز
لازیمدیر. دئموکراتیک توپلوملاردا
بیرلیک اختییاری بیر مسئله اولابیلر. گروه و توپلولوقلار داها چوخ باشاری الده
ائتمک اوچون بیرلیک یولونا گئدرلر، اما غئیری دئموکراتیک توپلوملاردا بیرلیک مسئله‌سی
وار اولما مسئله‌سی‌دیر. مخالف گوجلر اگر بیرلیک اولوشدورا بیلمزلرسه او زامان
وارلیقلاری دا تهلوکه‌یه گیره‌جک‌دیر.
میللی بیرلیک
نئجه یارانا بیلر؟
بیرلیگین
اولوشماسی اوچون اؤنجهلیکله بو
دوشونجه‌نین گروهلار و شخصلر طرفیندن احتیاجی حیسس ائدیلمه‌لی‌دیر. داها سونرا
حرکت ایچَریسینده‌کی اورتاق مسئله‌لر گوندمه گتیریلمه‌لی و اونلار اوزَرینده ایش
بیرلیگی یارادیلمالی‌دیر. بو ایش بیرلیگی اوچون دیالوق مسئله‌سینه اؤنم وئریلمه‌لی‌دیر.
بیرلیگی یاراتماق اوچون هدف اولاراق آذربایجان قویولمالی‌دیر. هدف آذربایجان
سئچیلدیگی زامان شخصلر و گروهلار و تشکیلاتلار آراسینداکی اختلافلار آزالار. او
زامان بیز بوتون عمل‌لریمیزی آذربایجانا صرف ائده‌ریک. تشکیلات‌لاریمیزی و میللی
فعاللاریمیزی هدف اولاراق بلیرله‌دیگیمیز زامان، او زامان بیز بیرلیکدن اوزاق
اولاجاغیق. هر شخص و تشکیلاتین اؤزونه گؤره چیخارلاری اولابیلر. اما هدفده
آذربایجان اولدوغو زامان بیز بیرلیک اوچون بؤیوک آددیملار آتمیش اولاجاغیق.
بو بیرلیگین
ایره‌لی سورمه‌سینه نه یؤنتملر اؤنریرسینیز؟
بیرلیگین
یارانما دوشونجه و احتیاجی اورتایا چیخدیقدان سونرا بیرلیگی اولوشدورماق اوچون
بللی یوللار واردیر. اؤنجهلیکله نئجه کی بیزیم اورتاق مسئله‌لریمیز واردیر،
دوشونجه آیریلیغی اولدوغوموز مسئله‌لر ده وار. بیز فیکیر آیریلیغی اولان مسئله‌لریمیزی
ده دانیشماغا آچمالی‌ییق. اؤرنک اولاراق آذربایجان میللی حرکتی سورجینده‌کی مجادله
شکلیدیر. بعضی گروهلار سیویل و مدنی مجادله‌نی مدافعه ائدَرکن، بعضی گروه و شخص‌لریمیز
ده خشونت طرزی مجادله یولو اولاراق گؤره بیلرلر. ایندی بیز بورادا آذربایجان میللی
منفعت‌لرینین هاردا اولدوغونو آراشدیرمالی‌ییق. نه یازیق کی میللی حرکت ایچریسینده
جزولر آراسیندا دیالوق مسئله‌سی آز اولدوغو اوچون بو مسئله‌لر قالیر و دوشونجه
فرقلی‌لیگیندن اختلافا نه‌دن اولور. بونون قاباغینی آلماق اوچون میللی فعاللار و
تشکیلاتلار آراسیندا گووَن دویغوسو اولوشارسا و بیر بیری ایله دانیشارلارسا او
زامان بیز اختیلافلاری آزالدیب بیر فیکیر دارتیشماسی فضاسی یارادابیلریک. بیرلیگین
یارادیلماسی و اولوشماسینداکی بوتون نه‌دنلری آراشدیرمالی‌ییق. بو نه‌دنلری بیلمه‌دیگیمیز
سوره‌جه بیرلیک اولوشدورماق قیسا سوره‌لی اولاجاقدیر.
میللی بیرلیگین
یارانماسیندا اؤزل اولاراق میللی حرکت‌ده چالیشان تشکیلاتلار، او جومله‌دن
"دیرَنیش" تشکیلاتی‌نین یئرینی و گؤرَ‌وینی نئجه گؤرورسونوز؟
ایندیکی دورمدا
بیرلیگی یاراتما گؤرَوی داها چوخ آذربایجان میللی حرکتی ایچرسینده فعالیت گؤسترن
سیاسی تشکیلاتلارا دوشمکده‌دیر. بو مسئله تکجه سیاسی تشکیلاتلار ایله حل اولونان
بیر مسئله دئییل. اما منه گؤره ان آزیندان
سیاسی بیرلیگین اولوشماسیندا تشکیلاتلاریمیز جیددی رول اوینایا بیلرلر. سیاسی
بیرلیگی یاراتماق اوچون تشکیلاتلاریمیز آرالارینداکی اختلافلاری آزالتمالی‌دیرلار.
اؤرنک اولاراق تشکیلاتلار آراسیندا گونئی آذربایجان اوچون اؤن گؤردوکلری بایراق
حاققیندا فیکیر آیریلیقلاری اختلافا و اوزاق دورمایا نه‌دن اولماقدادیر. بورادا
تشکیلاتلاریمیز اؤنَردیکلری بایراقلاری آذربایجان بایراغی دئییل، اؤز تشکیلات‌لارینین
بایراغی اولاراق تانیتمالی‌دیرلار. او زامان منه گؤره تشکیلاتلار آراسینداکی
اعتمادسازلیق اولاجاقدیر. آذربایجان میللی دیرَنیش تشکیلاتی یاری آچیق شکیلده
فعالیته باشلادیقدان سونرا دیگر تشکیلاتلار ایله یاخینلیق قورمایا چالیشیر. بونون
نتیجه‌سی اولاراق دا ایلک دفعه تشکیلاتلارین بیرگه بیاناتی وئریلدی. اوندان سونرا
دا یئنه تشکیلات منسوبلاری ایله یاخین دیالوقونو سوردورمک ایسته‌ییر. یاخین گله‌جک‌ده
بو دوغرولتودا یئنی آددیملار دا آتیلاجاق‌دیر.
سونوندا بو
قونویلا ایلگیلی سؤزونوز وارسا بویورون.
سون اولاراق
بونو دئمه‌لی‌یَم کی اگر آذربایجان میللی حرکتی ایچریسینده‌کی گوجلر (میللی
فعاللار، گروهلار، مئدیا و تشکیلاتلار) آراسیندا بیرلیک و ایش بیرلیگی یارادا
بیلمزسک، گله‌جک سیاسی معادله‌لرده جیددی سیخینتی‌لار یاشایاجاغیق. اونون اوچون ان
آزیندان بیز بیرلیک یارادا بیلمزسک بئله، اونون یارانما فضاسینی حاضیرلامالی‌ییق.
میللی بیرلیک دوشونجه سینی اورتایا آتان دوست‌لار و سیز میللی بیرلیک دوشرگه‌جیگی
منه گؤره بو فضانین حاضیرلانماسینی یارادابیلرسیز.
سیزین بو قوتسال
گؤرَوینیزده باشاریلار آرزولار و آذربایجان میللی دیرَنیش تشکیلاتی آدینا دئیه
بیلرم کی بوتون بیرلیک حرکتلرینی دستکله‌ییریک.
No comments:
Post a Comment