“میللی بیرلیک” دوشرگه‌جیگی بیرلیک حاققیندا موصاحیبه‌لر سیراسیندا، ایلک اؤنجه سایین مهندیس حسن راشدی ایله موصاحیبه آپاریب، بو موصاحیبه‌نین سورو و جاواب‌لارینی آشاغیدا اوخویا بیلرسینیز:
1 - سيزجه بيرليگين تعريفي نئجه اولا بيلر (بيرليگي نئجه تعريف ائتمك اولار)؟
ج : "بيرليك " سؤزده و لغوي آنلامدا "بير" و "واحد" آنلاميني داشيير ، لاكين سياسي ، اجتماعي ، مدني و باشقا آلانلاردا : هر بير توپلوم ، پارتیيا ، تشكيلات ، قوروم و حتي نئچه شخصين "ديلده، فيكيرده و عملده" بللي بير هدف و مقصد اوچون و مشخص بير چرچيوه‌ده چاليشمالارينا "بيرليك" دئمك اولار.
2 – ميللي حركت آتمسفرينده تعريفله‌ديگينيز بيرليگي نئجه گؤرورسونوز؟
ج : آذربايجان ميللي حركتي آزاد و دموكراتيك بير حركت اولاراق دونيا سويه‌سينده اینسان حاقلارينا داياناراق تاريخي آذربايجان توركلري‌نين گونئي بؤلومونده، يعني ايران سرحدلري ايچَريسينده ياشايان و رضاخان حاكميته گلن گوندن بوگونه كيمي ديل، مدنيت، شخصيت، تاريخ و هويت‌لري عليهينه يورودولن نژادپرستانه سياسته قارشي، مدني مبارزه چرچيوه‌سينده آذربايجان آيدينلاري طرفيندن و داها قاباريق شكيلده 1370– جي ايلدن بو طرفه باشلانميش مدني و اعتراضي حركت‌دير .
بو حركت، ايران چرچيوه‌سينده نفوس باخيميندان نسبي اكثريته ماليك اولاراق اقليت حاقلاريندان بئله فايدالانا بيلمه‌ين، مدني، فرهنگي، اجتماعي، سياسي و اقتصادي سيخينتي‌لاردان علاوه ان ايلكين و ابتدايي اينساني حاق ساييلان، يعني آنا ديلده تحصيل آلماقدان محروم قالان توركلرين حاقلاريني مدافعه ائتمك اوچون آذربايجان آيدينلاري طرفيندن باشلانميش ، گئتديكجه توپلومون مختليف لايه‌لري، اؤزلليكله بيليم‌يوردو اؤيرنجيلري بو جريانا قوشولموش و اونا يئني بير روح وئرميشدير.
گونئي آذربايجان ميللتي ايچيندن قايناقلانان بو حركت، يالنيز بير حزبي و گروهي حركت و چابا يوخ، بلكه دونيا سويه‌سينده، اؤزلليكله ايران سياسي سينيرلاري ايچينده ياشايان بوتون ميللتلر و قوميت‌لرين حاقلارينا سايغي دوياراق گونئي آذربايجان توركلري و ايرانين مختليف شهر و بؤلگه‌لرينده ياشايان باشقا توركلرين مدني– فرهنگي، اجتماعي، سياسي، اقتصادي و باشقا ساحه‌لرده حاقلاريني قوروماق و هرجور آيري سئچکي‌ليك و آسيميلاسيون سياستينه قارشي حركت اولدوغوندان، ميللت طرفيندن "ميللي حركت" آدلانميشدير.
طبيعي‌دير ميللي حركت آتمسفرينده، ميللي بيرليگي قوروماق، ان بيرينجي و ضروري وظيفه و گؤرودير و بو وظيفه‌ني يئرينه يئتيرمك اوچون ميللي حركت چرچيوه‌سينده چاليشماق لازيم‌دير و ميللي حركت چرچيوه‌سينده چاليشماق اوچون، شخصي و گروهي منافع و قازانج اوچون يوخ، بوتون حركت و چابالار ميللي منافع يولوندا اولمالي‌دير.
ميللي منافع و بيرليگي قوروماق اوچون، هر بير ميللتچي، افراط و تفريطلي حركت‌لردن اوزاق قالمالي و هئچ بير ميللتچي، باشقا ميللتچي‌نين اؤزل حيات و ياشامينا آياق قويمامالي و ميللتچي‌ليك قوراللاري ايچينده حركت ائدن اينسانلارين كئچميش اجتماعي– سياسي دوروملاريني نظره آلاراق بوگونكو دوروم و حركتلريني اساس توتمالي و ميللي حركت و بيرليگه ضرر وئرن بوتون مناقشه‌لي مسئله و مؤوضوعلاردان اوزاق قالمالي‌دير.
3 - داواملي، اوزون سورن و دايانيملي بيرليگين يارانماسينا نه يؤنتملر اؤنريرسينيز؟
ج : ميللي حركتين بيرليك و داوامينا فيكيرله‌شن هر بير ميللتچي بيلمه‌لي‌دير، ، ايران آدلي اؤلكه‌نين نسبي اكثريت نفوسو نو تشكيل ائدن توركلرين، بو اؤلكه‌ده ابتدايي‌دن توتدو بيليم‌يوردونون (دانيشگاهين) سونونا كيمي و بوتون تخصص‌لرده فارسلار قدري آنا ديلده تحصيل آلماق حاقلاريندان علاوه، ياشامين بوتون ساحه‌لرينده، فارسلاردان چوخ دئميرم، فارسلار قدري حاق و حقوقلاري وار؛ بير حالدا كي، ايندي‌ليكده بو اؤلكه‌ده 30 ميليوندان چوخ جمعيتي اولان توركلرين، 150 مين نفر حدودوندا جمعيتي اولان ائرمني‌لر قدري ده آنا ديلده تحصيل آلماغا حاقلاري يوخدور!
بئله بير دورومدا هئچ بير ميللتچي اؤزونه اجازه وئرمه‌مه‌لي‌دير، هله ان ايلكين و ابتدايي حاقلارينا چاتا بيلمه‌ين توركلرين مدني مبارزه‌سي يولوندا تزلزل ياراتسين.
طبيعي‌دير مدني مبارزه يولوندا آدديملايان هر بير ميللتچي، هئچ بير مادّي منفعت و قازانج اوممادان و بوتون سيخينتي و بوغونتولارا رغما، ايران اؤلكه‌سينده ياشايان بوتون اينسانلارين برابر حقوقا ماليك اولمالاري و نفوسلاري اساسيندا اؤلكه امكانلاريندان فايدالانمالاري و هر هانسي بير ميللت و قوميّتين باشقا ميللتلر و قوميت‌لره اربابليق ائتمه‌مه‌سي يولوندا چاليشماسينا داوام ائدير.
بئله بير دورومدا هر هانسي بير منم - منمليك، اؤزونو و سئوديگي شخص و قورومون يولونو ان دوزگون يول بيليب باشقا ميللتچي و مدني مبارزلري، يولونو آزان و حتي خائن آدلانديرماق ميللي حركتيميزه ان بويوك ضربه‌دير .
بيز حقيقي بير ميللتچي اولاراق دموكراسيني اؤزوموزدن باشلامالي و ميللي منافع يولوندا فيكير و عقيده‌ميزله يوزه يوز موافق اولمايان، لاكين بو يولدا اينام و ايمانلا چاليشان بوتون ميللتچي‌لري ايچيميزه آلمالی‌ييق؛ بيزيم ميللي حركتيميز، يالنيز حزبي و گروهي بير حركت دئييل، اونون ايچينده روحاني، تاجير، اؤيرتمن، وكيل، طبيب، مهندیس، شاعير، يازيچي و اؤيرنجي‌دن توتدو عادي ايشچي و اكينچي‌يه قدر چاليشانلاري وار؛ طبيعي‌دير بو گئنيشليك‌ده طيف‌ده، فيكير گئنيشليگي ده چوخ اولمالي‌دير، و بيزيم حركتيميزين اصالتي و اؤزلليگي ده ائله بوندادير؛ بو اوزدن، بيز بوتون بو طيف‌لري نظره آلاراق هر بير دانيشيق و حركتيميزي معين چرچيوه‌ده و بوتون طيف‌لري ايچينه آلان ميللي منافعيميز اوزَرينده تنظيم ائتمه‌لي‌یيك .
لاكين هله ان ايلكين و ابتدايي مدني – فرهنگي حقوقا چاتمادان، فيكير فرقلريني مئيدانا آتيب ميللي حركتيميزه خلل ياراتماق هئچ بير ايناملي ميللتچي‌نين ذهنينه بئله دوشمه‌مه‌لي‌دير .
داواملي، اوزون سورن و دايانيملي بير بيرليگه چاتماق اوچون، بوتون شخصي و گروهي منم‌ليک‌لره گؤز يوماراق وار گوج و قوه‌ميزله و تام ايمان و ايناملا، رضاخان حاكيمیيته گلن گوندن بوگونه كيمي تاپدالانميش ميللي هويت و وارليغيميز، دانيلميش ديليميز، تحريف اولموش تاريخيميز، تحقير اولموش شخصيتيميز و بير سؤزله يالنيز ميللي حاقلاريميز يولوندا چاليشمالي‌یيق!
Gözəl müsahibə,
ReplyDeleteH.Raşedi bəyin sözlərinə qatilmamaq olmaz. Amma əfsus kı, birlik deməklə birlik yaranmaz. Mən ancaq arzu elirəmkı, milli faalarımız şəxsı ambisiyalarından əl çəksinlər və birbirinə dəyər verməyı öyrənsinlər.
Hörmətlər
Kərim Urumudan