دؤولت-میللت
ايدولوژياسی اولان ناسیونالیسمین ان اؤنملی فونکسیونلاریندان، میللی بیرلیک
یاراتماق‌دیر. اؤزللیک‌له میللی قورتولوشو اؤنده توتان ناسیونالیسم، میللی سیاست
فلسفه‌سی‌نین ان بلیرگین تظاهری‌دیر. ایستعمار و آسیمیلاسیون خسته‌لیگینه یولوخموش
بیر میللت اوچون ناسیونالیسم چیخیش یولودور. قارشی‌سین‌داکی میللتده میللی شعور
یاراتماغا، میللی ایراده‌نین حاکمیتده تمثیل اولماسینا چالیشان ناسیونالیسم، او
میللتی میللی حاکمیت قورماق یولوندا بیر آرایا گتیرمه‌یه چالیشیر. میللتین بوتون
کسیم‌لرینی، جینسیت‌دن و دونیا گؤروشون‌دن آسيلی اولمایا‌راق بیرلشدیریر بو ایدئا.
وحدت سیاستی و یا میللی سیاست میللتچی‌لیگین آیریلماز ایلکه‌سی‌دیر. کثرتده اولان
سیاسی اجتماعی قروپ‌لارین وحدت نؤقطه‌سینی اورتایا قویان ناسیونالیسم، تکجه کوتله‌لری
دئییل، بیر بیرینه تام موخالیف ساییلان ساغچی-سولچولاری بئله بیر آرایا گتیرمه‌لی‌دیر.
بئله اولمادیغی دورومدا، یا ناسیونالیسمی ایره‌لی سورن آکتیویست‌لرده چاتمازلیق
وار، یادا میللتچی‌لیک اوستون سؤیلم قازانماییب. بیر میللت آراسیندا اوستون سؤیلم،
ان اؤنملی و عاجیل احتیاج‌لارین گؤسترگه‌سی‌دیر.